ಹಾಂಗ್ ಕಾಂಗ್ ನಲ್ಲಿ ಸುಮಾರು 140 ವರ್ಷಗಳಲ್ಲೇ ಅತ್ಯಂತ ಅತಿ ಹೆಚ್ಚಿನ ಮಳೆ ಸುರಿದಿದೆ. ದಾಖಲೆಯ ಮಳೆಯಿಂದಾಗಿ ಹಾಂಗ್ ಕಾಂಗ್ ಜನಜೀವನ ಅಸ್ತವ್ಯಸ್ತಗೊಂಡಿದೆ. ಇದರ ಪರಿಣಾಮವಾಗಿ ಉಂಟಾದ ಹಠಾತ್ ಪ್ರವಾಹವು ಮೆಟ್ರೋ ನಿಲ್ದಾಣಗಳನ್ನು ಮುಳುಗಿಸಿದೆ. ರಸ್ತೆಗಳಲ್ಲಿ ವಾಹನ ಚಾಲಕರು ಸಿಕ್ಕಿಬಿದ್ದಿದ್ದಾರೆ. ಅಧಿಕಾರಿಗಳು ಶಾಲೆಗಳನ್ನು ಸ್ಥಗಿತಗೊಳಿಸುವ ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಂಡಿದ್ದಾರೆ ಮತ್ತು ಸುರಕ್ಷಿತ ಆಶ್ರಯವನ್ನು ಪಡೆಯಲು ಸಾರ್ವಜನಿಕರಿಗೆ ಸಲಹೆ ನೀಡಿದ್ದಾರೆ.

7.5 ಮಿಲಿಯನ್ ಇರುವ ಜನಸಂಖ್ಯೆಯ ಈ ನಗರದಲ್ಲಿ ಭಾರಿ ಮಳೆ ಸುರಿಯುತ್ತಿರುವುದರಿಂದ ಇಲ್ಲಿನ ನಿವಾಸಿಗಳು ಪ್ರವಾಹದ ಮೂಲಕ ಸಾಗುತ್ತಿರುವುದನ್ನು ಫೋಟೋಗಳು ಮತ್ತು ವೀಡಿಯೊಗಳು ತೋರಿಸುತ್ತವೆ. ತಗ್ಗು ಪ್ರದೇಶಗಳೆಲ್ಲಾ ಮುಳುಗಡೆಯಾಗಿದೆ.

ಗುರುವಾರ ತಡರಾತ್ರಿ ಪ್ರವಾಹ ಪ್ರಾರಂಭವಾಯಿತು.
ಹಾಂಗ್ ಕಾಂಗ್ ವೀಕ್ಷಣಾಲಯವು ರಾತ್ರಿ 11 ರಿಂದ ಮಧ್ಯರಾತ್ರಿಯ ನಡುವೆ 158 ಮಿಲಿಮೀಟರ್ (6.2 ಇಂಚು) ಮಳೆಯನ್ನು ದಾಖಲಿಸಿದೆ. ಇದು 1884 ರಲ್ಲಿ ದತ್ತಾಂಶ ಸಂಗ್ರಹಣೆ ಪ್ರಾರಂಭವಾದಾಗಿನಿಂದ ದಾಖಲಾದ ಅತಿ ಹೆಚ್ಚು ಗಂಟೆಯ ಮಳೆಯಾಗಿದೆ ಎಂದು ಸರ್ಕಾರಿ ಸುದ್ದಿ ಪ್ರಕಟಣೆ ತಿಳಿಸಿದೆ.

Provided by

ನಗರದ ಕೆಲವು ಭಾಗಗಳಲ್ಲಿ 24 ಗಂಟೆಗಳ ಅವಧಿಯಲ್ಲಿ ಸುಮಾರು 500 ಮಿ.ಮೀ (19.7 ಇಂಚು) ಮಳೆಯಾಗಿದೆ ಎಂದು ಆನ್ಲೈನ್ ಹವಾಮಾನ ದತ್ತಾಂಶ ಸೈಟ್ ಒಜಿಮೆಟ್ ವರದಿ ಮಾಡಿದೆ.

ಎಡೆಬಿಡದೆ ಸುರಿಯುತ್ತಿರುವ ಮಳೆ ಮತ್ತೊಮ್ಮೆ ಹಾಂಗ್ ಕಾಂಗ್ ನ ಆರ್ಥಿಕ ಕೇಂದ್ರದಾದ್ಯಂತ ಸಾರಿಗೆ ಮತ್ತು ವ್ಯಾಪಾರ ಕಾರ್ಯಾಚರಣೆಗಳಲ್ಲಿ ವ್ಯಾಪಕ ನಷ್ಟಕ್ಕೆ ಕಾರಣವಾಗಿದೆ. ಷೇರು ಮಾರುಕಟ್ಟೆಯು ವ್ಯಾಪಾರವನ್ನು ರದ್ದುಗೊಳಿಸಿತು. ಎಲ್ಲಾ ಶಾಲೆಗಳು ದಿನವಿಡೀ ಮುಚ್ಚಲ್ಪಟ್ಟವು. ಅಪಾಯಕಾರಿ ಪ್ರಯಾಣದ ಪರಿಸ್ಥಿತಿ ನಿರ್ಮಾಣವಾಗಿದ್ದರಿಂದ ಉದ್ಯೋಗಿಗಳಿಗೆ ಮನೆಯಿಂದ ಕೆಲಸ ಮಾಡಲು ಅನುಮತಿ ನೀಡುವಂತೆ ಅಧಿಕಾರಿಗಳು ಕಂಪನಿಗಳಿಗೆ ಮನವಿ ಮಾಡಿದರು.