ಹಿಂದೂ ಯುವತಿ, ಮುಸ್ಲಿಮ್ ಯುವಕನ ವಿವಾಹ ಫಿಕ್ಸ್: ಸ್ವಾಮೀಜಿಯಿಂದ ಸಂಧಾನಕ್ಕೆ ಯತ್ನ

21/11/2021

ಮಂಗಳೂರು: ಹಿಂದೂ ಯುವತಿ ಹಾಗೂ ಮುಸ್ಲಿಮ್ ಯುವಕನ ಮದುವೆಯ ಆಹ್ವಾನ ಪತ್ರಿಕೆ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆದ ಬಳಿಕ ಕರಾವಳಿಯ ಸ್ವಾಮೀಜಿಯೊಬ್ಬರು ಹಿಂದೂ ಯುವತಿಯ ಮನೆಗೆ ಭೇಟಿ ನೀಡಿ ಮನೆಯವರ ಜೊತೆ ಸಂಧಾನ ನಡೆಸಲು ಯತ್ನಿಸಿದ್ದಾರೆ.

ವಜ್ರದೇಹಿ ರಾಜಶೇಖರಾನಂದ ಸ್ವಾಮೀಜಿ ಅವರು, ಮುಸ್ಲಿಮ್ ಯುವಕನೊಂದಿಗಿನ ವಿವಾಹ ನಿರ್ಧಾರವನ್ನು ಬದಲಿಸುವಂತೆ ಯುವತಿ ಹಾಗೂ ಯುವತಿಯ ಪೋಷಕರೊಂದಿಗೆ ಮನವಿ ಮಾಡಿಕೊಂಡಿದ್ದಾರೆ ಎನ್ನಲಾಗಿದೆ.

ಮೆಡಿಕಲ್ ವಿದ್ಯಾರ್ಥಿಯಾಗಿರುವ ಕೇರಳದ ಕಣ್ಣೂರಿನ ಯುವಕನ ಜೊತೆಗೆ ಯುವತಿಯ ವಿವಾಹ ಫಿಕ್ಸ್ ಮಾಡಲಾಗಿದೆ. ನವೆಂಬರ್ 29ರಂದು ಇವರಿಬ್ಬರ ವಿವಾಹ ಕೇರಳದ ಕಣ್ಣೂರಿನಲ್ಲಿಯೇ ನಡೆಯಲಿದೆ. ಕಳೆದ ಮೂರು ವರ್ಷಗಳಿಂದ ಈ ಜೋಡಿ ಪ್ರೀತಿಸುತ್ತಿದ್ದು, ಇದೀಗ ಎರಡೂ ಕುಟುಂಬದವರು ವಿವಾಹಕ್ಕೆ ಒಪ್ಪಿಗೆ ಸೂಚಿಸಿದ್ದು, ಹೀಗಾಗಿ ಮದುವೆ ನಿಶ್ಚಯಗೊಳಿಸಲಾಗಿತ್ತು. ಈ ನಡುವೆ ಇವರ ವಿವಾಹದ ಆಹ್ವಾನ ಪತ್ರಿಕೆ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಹೀಗಾಗಿ ಇದು ಲವ್ ಜಿಹಾದ್ ಎಂದು ಕೆಲವು ಸಂಘಟನೆಗಳು ಆರೋಪಿಸಿದ್ದವು.

ವರದಿಯ ಪ್ರಕಾರ, ಯುವತಿಯ ಮನೆಗೆ ಭೇಟಿ ನೀಡಿದ ಸ್ವಾಮೀಜಿಗಳು ವಿವಾಹವನ್ನು ಮುಂದೂಡಿ, ಸ್ವಲ್ಪ ಆಲೋಚಿಸಿ ಎಂಬಂತೆ ಯುವತಿಯ ಪೋಷಕರಿಗೆ ಸಲಹೆ ನೀಡಿದ್ದಾರೆ ಎಂದು ಹೇಳಲಾಗಿದೆ. ಆದರೆ, ಮುಸ್ಲಿಮ್ ಯುವಕನನ್ನು ವಿವಾಹವಾದರೂ ಯುವತಿ ಹಿಂದೂ ಧರ್ಮದಲ್ಲೇ ಮುಂದುವರಿಯಲಿದ್ದಾಳೆ ಎಂದು ಸ್ವಾಮೀಜಿಗೆ ತಿಳಿಸಿ ಪೋಷಕರು, ಸ್ವಾಮೀಜಿಯನ್ನು ಗೌರವಿಸಿ ಕಳುಹಿಸಿದ್ದಾರೆ ಎಂದು ಮಾಧ್ಯಮವೊಂದು ವರದಿ ಮಾಡಿದೆ.