ಪಬ್ ನಲ್ಲಿ ಕಿರಿಕ್: ಬಿಗ್ ಬಾಸ್ ಖ್ಯಾತಿಯ ಕಿರಿಕ್ ಕೀರ್ತಿಗೆ ಬಿಯರ್ ಬಾಟಲಿಯಿಂದ ಹಲ್ಲೆ

03/12/2021

ಬೆಂಗಳೂರು: ಪಬ್ ನಲ್ಲಿ ನಡೆದ ಕಿರಿಕ್ ನಲ್ಲಿ ಬಿಗ್ ಬಾಸ್ ಖ್ಯಾತಿಯ ಕಿರಿಕ್ ಕೀರ್ತಿ ಅವರಿಗೆ ಅಭಿಮಾನಿಯೋರ್ವ ಬಿಯರ್ ಬಾಟಲಿಯಲ್ಲಿ ಹಲ್ಲೆ ನಡೆಸಿರುವ ಘಟನೆ ವರದಿಯಾಗಿದ್ದು, ಬೆಂಗಳೂರಿನ ಸದಾಶಿವನಗರದ ಪಬ್ ನಲ್ಲಿ ಈ ಘಟನೆ ನಡೆದಿದೆ ಎಂದು ತಿಳಿದು ಬಂದಿದೆ.

ವರದಿಗಳ ಪ್ರಕಾರ, ಗುರುವಾರ ಕಿರಿಕ್ ಕೀರ್ತಿ ತಮ್ಮ ಸ್ನೇಹಿತರ ಜೊತೆಗೆ ಪಬ್ ಗೆ ತೆರಳಿದ್ದರು ಎನ್ನಲಾಗಿದೆ. ಈ ವೇಳೆ ಪಕ್ಕದ ಟೇಬಲ್ ನಲ್ಲಿ ಕುಳಿತಿದ್ದ ವ್ಯಕ್ತಿಯೊಬ್ಬರು ಕಿರಿಕ್ ಕೀರ್ತಿ ಅವರ ಅನುಮತಿ ಇಲ್ಲದೇ ಫೋಟೋ ತೆಗೆದುಕೊಂಡಿದ್ದಾರೆ ಎನ್ನಲಾಗಿದೆ. ಈ ವಿಚಾರಕ್ಕೆ ಸಂಬಂಧಿಸಿದಂತೆ ಕಿರಿಕ್ ಕೀರ್ತಿ ಆ ವ್ಯಕ್ತಿಯನ್ನು ತರಾಟೆಗೆತ್ತಿಕೊಂಡಿದ್ದರು ಎನ್ನಲಾಗಿದೆ.

ಈ ವೇಳೆ ವ್ಯಕ್ತಿ ಕ್ಷಮೆ ಕೇಳಿದರೂ, ಬಿಡದೇ ಕಿರಿಕ್ ಕೀರ್ತಿ ವ್ಯಕ್ತಿಯ ಮೇಲೆ ಹರಿಹಾಯ್ದಿದ್ದರು ಎನ್ನಲಾಗಿದೆ. ಇದರಿಂದ ರೊಚ್ಚಿಗೆದ್ದ ವ್ಯಕ್ತಿ ಬಿಯರ್ ಬಾಟಲಿಯಿಂದ ಕಿರಿಕ್ ಕೀರ್ತಿಗೆ ಹಲ್ಲೆ ನಡೆಸಿದ್ದಾರೆ ಎಂದು ಹೇಳಲಾಗಿದೆ.

ಇನ್ನೂ ಈ ಸಂಬಂಧ ಪ್ರತಿಕ್ರಿಯಿಸಿರುವ ಕಿರಿಕ್ ಕೀರ್ತಿ, “ನಾನು ಕುಳಿತಿದ್ದ ಟೇಬಲ್ ಹತ್ರ ವ್ಯಕ್ತಿಯೋರ್ವ, ಬಾ ನಿನ್ನ ಜೊತೆಗೆ ಮಾತನಾಡಬೇಕು ಎಂದು ಕರೆದ. ಅವನಿಗೆ ಕುಡಿದು ನಿಂತುಕೊಳ್ಳಲು ಕೂಡ ಸಾಧ್ಯವಾಗ್ತಿರಲಿಲ್ಲ. ನಾನು ಯಾರು ಅಂತ ಗೊತ್ತಾ ಎಂದು ಕೇಳಿದ, ಆಗ ನಾನು ಗೊತ್ತಿಲ್ಲ ಅಂತ ಹೇಳಿದೆ. ನೀನು ಯಾರು ಅಂತ ಗೊತ್ತಲೈ ಎಂದು ಬ್ಯಾಡ್ ವರ್ಡ್ ಯೂಸ್ ಮಾಡಿದ. ಈ ರೀತಿ ಮಾಡ್ಬೇಡ, ನಿನ್ಗೆ ನಿಂತು ಕೊಳ್ಳಲು ಕೂಡ ಆಗ್ತಿಲ್ಲ, ಫಸ್ಟ್ ಮನೆಗೆ ಹೋಗು ಎಂದು ಹೇಳಿದೆ. ಅವನ ಫ್ರೆಂಡ್ ಇನ್ನೊಬ್ಬ ಇದನ್ನು ವಿಡಿಯೋ ಮಾಡ್ತಿದ್ದ. ಅದಕ್ಕೆ ನಾನು ವಿರೋಧ ಮಾಡಿ, ಯಾಕೆ ವಿಡಿಯೋ ಮಾಡ್ತಿದ್ದಿ ಎಂದು ಫೋನ್ ಕಿತ್ತುಕೊಳ್ಳಲು ನೋಡಿದೆ. ಆ ವೇಳೆ 3 ಬಿಯರ್ ಬಾಟಲಿಯಲ್ಲಿ ನನ್ನ ತಲೆಗೆ ಎಲ್ಲ ಹೊಡೆದಿದ್ದಾರೆ. ಯಾಕೆ ಹೊಡೆದರು ಅಂತ ಮ್ಯಾಟ್ರೇ ಇಲ್ಲ… ಎಂದು ಕಿರಿಕ್ ಕೀರ್ತಿ ವಿವರಿಸಿದ್ದಾರೆ.