ವಿಜಯವಾಡ: ಬ್ಯಾಂಕ್  ಮ್ಯಾನೇಜರ್ ಓರ್ವ ತನ್ನ ಸಹೋದ್ಯೋಗಿಗಳು ಮಾತ್ರವಲ್ಲದೇ, ಬ್ಯಾಂಕ್ ಗೆ ಬರುವ ಮಹಿಳಾ ಗ್ರಾಹಕಿಯರನ್ನೂ ಲೈಂಗಿಕವಾಗಿ ಬಳಸಿಕೊಂಡಿರುವ ಘಟನೆ ನಡೆದಿದ್ದು, ಸಿಸಿ ಕ್ಯಾಮರಾದಲ್ಲಿ ದೃಶ್ಯ ಸೆರೆಯಾದ ಬಳಿಕ ಈತನ ಒಂದೊಂದೇ ಕೃತ್ಯ ಬಯಲಾಗಿದೆ.

ಆಂಧ್ರಪ್ರದೇಶದ ಬ್ಯಾಂಕೊಂದರ ಮ್ಯಾನೇಜರ್ ನಾಗೇಶ್ ಪೊದಲಕುರ್ ಈ ಕೃತ್ಯ ನಡೆಸಿದ ಆರೋಪವನ್ನು ಎದುರಿಸುತ್ತಿದ್ದು,  ಲೋನ್ ಬೇಕಾದರೆ,  ಅದಕ್ಕೆ ಪ್ರತಿಯಾಗಿ ತನ್ನ ಲೈಂಗಿಕ ಬಯಕೆ ಪೂರೈಸಬೇಕು ಎಂದು ಆತ ಮಹಿಳೆಯರಿಗೆ ಆಮಿಷವೊಡ್ಡುತ್ತಿದ್ದು, ಹಲವು ಮಹಿಳೆಯರನ್ನು ಲೈಂಗಿಕವಾಗಿ ಬಳಸಿಕೊಂಡಿದ್ದಾನೆ ಎಂದು ಹೇಳಲಾಗುತ್ತಿದೆ.

ಬ್ಯಾಂಕ್ ನ ನೆಲ್ಲೂರು ಜಿಲ್ಲೆಯ ಪೊದಲಕುರ್ ಶಾಖೆಯಲ್ಲಿ ಈ ರೀತಿಯ ಕೃತ್ಯವನ್ನು ಆರೋಪಿ ನಡೆಸುತ್ತಿದ್ದ. ಈತನ ಕಿರುಕುಳ ಸಹಿಸಲಾಗದೇ ಹಲವು ಮಹಿಳಾ ಸಹೋದ್ಯೋಗಿಗಳು ಸ್ವಯಂ ವರ್ಗಾವಣೆ ತೆಗೆದುಕೊಂಡಿದ್ದಾರೆ ಎನ್ನುವ ಅಂಶಗಳು ಇದೀಗ ತಿಳಿದು ಬಂದಿದೆ.

ಇತ್ತೀಚೆಗೆ ಬ್ಯಾಂಕ್ ನ ಸಿಸಿ ಕ್ಯಾಮರದಲ್ಲಿ  ಮ್ಯಾನೇಜರ್ ನ ದುಷ್ಕೃತ್ಯ ಸೆರೆಯಾಗಿತ್ತು. ಮಹಿಳೆಯೊಬ್ಬರನ್ನು ತನ್ನ ಕಚೇರಿಯಲ್ಲಿಯೇ ಅನುಚಿವಾಗಿ ಸ್ಪರ್ಶಿಸುತ್ತಿರುವ ವಿಡಿಯೋ ವೈರಲ್ ಆಗಿತ್ತು. ಈ ವಿಡಿಯೋ ವೈರಲ್ ಆದ ಬಳಿ ಆರೋಪಿ ನಾಗೇಶ್ ತಲೆ ಮರೆಸಿಕೊಂಡಿದ್ದಾನೆ. ಸದ್ಯ ಆರೋಪಿಯ ಪತ್ತೆಗಾಗಿ ಪೊಲೀಸರು ಶೋಧ ನಡೆಸುತ್ತಿದ್ದಾರೆ.