ಬಾಲಿವುಡ್ ಸಿನಿಮಾದಲ್ಲಿ ಹಲವು ಸಮಯದಿಂದ ನಟಿಯಾಗಿ ಮೆರೆದಿದ್ದ ಮಮತಾ ಕುಲಕರ್ಣಿ ಇದೀಗ ಸನ್ಯಾಸಿಯಾಗಿ ಗಮನ ಸೆಳೆದಿದ್ದಾರೆ. 90ರ ದಶಕದಲ್ಲಿ ಬಾಲಿವುಡ್ ಸಿನಿಮಾದಲ್ಲಿ ದೊಡ್ಡ ಮಟ್ಟದಲ್ಲಿ ಕಾಣಿಸಿಕೊಂಡಿದ್ದ ಮಮತಾ ಕುಲಕರ್ಣಿ ಇದೀಗ ಕುಂಭಮೇಳದಲ್ಲಿ ಸನ್ಯಾಸಿಯಾಗುವ ವಿಧಿ ವಿಧಾನಗಳನ್ನು ಪೂರೈಸಿದ್ದಾರೆ.

Provided by

ದಿನದ ಹಿಂದೆ ಕಿನಾರ್ ಅಖಾರ ತಲುಪಿದ ಮಮತಾ ಕುಲಕರ್ಣಿ ಆಚಾರ್ಯ ಮಹಾಮಂಡಲೇಶ್ವರ ಡಾ. ಲಕ್ಷ್ಮಿ ನಾರಾಯಣ್ ತ್ರಿಪಾಠಿಯನ್ನು ಭೇಟಿಯಾದರು. ಬಳಿಕ ಮಹಾ ಮಂಡಲೇಶ್ವರ ಆಗಿ ಅಧಿಕೃತವಾಗಿ ಘೋಷಣೆಯಾಗುವುದರೊಂದಿಗೆ ಅವರು ಸನ್ಯಾಸಿ ಜೀವನವನ್ನು ಪ್ರಾರಂಭಿಸಿದರು. ಈ ಮೂಲಕ ಮಮತಾ ಕುಲಕರ್ಣಿ ಎಂಬ ಹೆಸರಿನ ಬದಲು ಶ್ರೀ ಯಮಃ ಮಮತಾ ನಂದಿಗಿರಿ ಎಂಬ ಹೆಸರಿನೊಂದಿಗೆ ಅವರಿನ್ನು ಗುರುತಿಸಿಕೊಳ್ಳಲಿದ್ದಾರೆ.

ಕೇಸರಿ ಬಟ್ಟೆ ಮತ್ತು ರುದ್ರಾಕ್ಷಿಮಾಲೆಯನ್ನು ಧರಿಸಿ ಮಮತಾ ಅಖಾರ ಪ್ರವೇಶಿಸಿದರು. ಸನ್ಯಾಸಿ ಜೀವನವನ್ನು ನಡೆಸುವ ಕುರಿತಂತೆ ಅವರು ಸುಮಾರು ಒಂದು ಗಂಟೆಯ ಕಾಲ ಚರ್ಚೆ ನಡೆಸಿದರು.

ಅಮೀರ್ ಖಾನ್ ಸಲ್ಮಾನ್ ಖಾನ್ ಶಾರುಖಾನ್ ಮುಂತಾದ ನಟರೊಂದಿಗೆ ನಟಿಸಿದ ಹೆಗ್ಗಳಿಕೆ ಇವರದು. 1992 ರಲ್ಲಿ ಬಿಡುಗಡೆಯಾದ ತಿರಂಗ ಎಂಬ ಸಿನಿಮಾದೊಂದಿಗೆ ಇವರು ಚಿತ್ರರಂಗಕ್ಕೆ ಕಾಲಿಟ್ಟರು. ವಕ್ತ್ ಹಮಾರಾ ಹೈ, ಕ್ರಾಂತಿವೀರ್, ಸಬ್ಸೆ ಬಡಾ ಕಿಲಾಡಿ, ಆಂದೋಲನ್, ಬಾಝಿ, ಚೈನಾ ಗೇಟ್ ಮುಂತಾದ ಯಶಸ್ವೀ ಸಿನಿಮಾಗಳಲ್ಲಿ ಅವರು ನಟಿಸಿದ್ದಾರೆ. 2001ರಲ್ಲಿ ಬಿಡುಗಡೆಯಾದ ಚುಪಾ ರುಸ್ತಮ್ ಅವರ ಕೊನೆಯ ಹಿಟ್ ಸಿನಿಮಾವಾಗಿದೆ. ಕಬಿ ತುಂ ಕಬಿ ಹಮ್ ಎಂಬ ಸಿನಿಮಾದ ಬಳಿಕ ಅವರು ಚಿತ್ರರಂಗದಿಂದ ಕಾಣೆಯಾದರು.

ಮರಾಠ ಬ್ರಾಹ್ಮಣ ಕುಟುಂಬದ ಮಮತಾ ಆ ಬಳಿಕ ಮಾದಕ ವಸ್ತುವಿನ ಡಾನ್ ಆಗಿ ಗುರುತಿಸಿಕೊಂಡಿದ್ದ ವಿಕಿ ಗೋಸ್ವಾಮಿ ಜೊತೆಗಿನ ಸಂಬಂಧದ ಕಾರಣಕ್ಕಾಗಿ ಸುದ್ದಿಗೆ ಒಳಗಾದರು. 2,000 ಕೋಟಿ ರೂಪಾಯಿ ಮೊತ್ತದ ಮಾದಕ ವಸ್ತುಗಳ ಕಳ್ಳಸಾಗಾಟ ಪ್ರಕರಣದಲ್ಲಿ ಪೊಲೀಸರು ಈ ಮಮತಾ ಕುಲಕರ್ಣಿಯನ್ನು ಕೂಡ ಆರೋಪಿಯಾಗಿ ಹೆಸರಿಸಿದ್ದರು. ಈ ಪ್ರಕರಣಕ್ಕೆ ಸಂಬಂಧಿಸಿ ಮಮತಾ ಕುಲಕರ್ಣಿ ಮತ್ತು ವಿಕ್ಕಿ ಗೋಸ್ವಾಮಿಯ ಆಸ್ತಿಗಳನ್ನು ಪತ್ತೆ ಹಚ್ಚುವುದಕ್ಕೆ ನ್ಯಾಯಾಲಯ ಆದೇಶವನ್ನು ನೀಡಿದೆ.

ಇದೇ ವೇಳೆ ತಾನು ಸನ್ಯಾಸಿಯಾಗುವ ನಿರ್ಧಾರವನ್ನು ಎರಡು ಸಾವಿರನೇ ಇಸವಿಯಲ್ಲಿ ತೆಗೆದುಕೊಂಡಿರುವುದಾಗಿ ಮಮತಾ ಕುಲಕರ್ಣಿ ಅವರು ಪತ್ರಕರ್ತರೊಂದಿಗೆ ಹೇಳಿದ್ದಾರೆ. ನಾನು 40, 50ರಷ್ಟು ಸಿನಿಮಾಗಳಲ್ಲಿ ನಟಿಸಿದೆ. ಸಾಕಷ್ಟು ಸಿನಿಮಾಗಳಲ್ಲಿ ಆಫರ್ ಇರುವಾಗಲೇ ನಾನು ಈ ಸಿನಿಮ ರಂಗದಿಂದ ಹೊರ ನಡೆದೆ. ಬೇರೆ ಯಾವುದಾದರೂ ಸಮಸ್ಯೆಯ ಕಾರಣದಿಂದಾಗಿ ನಾನು ಸಿನಿಮಾ ರಂಗವನ್ನು ತೊರೆದುದಲ್ಲ ಅಥವಾ ಸನ್ಯಾಸಿಯಾಗುವುದಕ್ಕೆ ನಿರ್ಧಾರ ಕೈಗೊಂಡದ್ದಲ್ಲ. ದೇವನ ಅನುಗ್ರಹವನ್ನು ಆಗ್ರಹಿಸಿಯೇ ನಾನು ಈ ಮಾರ್ಗವನ್ನು ಆಯ್ಕೆ ಮಾಡಿಕೊಂಡಿದ್ದೇನೆ ಎಂದು 52 ವರ್ಷದ ಮಮತಾ ಕುಲಕರ್ಣಿ ಹೇಳಿದ್ದಾರೆ.

ಜಾಗತಿಕ ಕನ್ನಡಿಗರ ಅಚ್ಚುಮೆಚ್ಚಿನ ಸುದ್ದಿತಾಣ ಮಹಾನಾಯಕ ಸುದ್ದಿಗಳನ್ನು ನಿಮ್ಮ ವಾಟ್ಸಾಪ್ ಗ್ರೂಪ್ ಗಳಿಗೆ ಕಳುಹಿಸಬೇಕೇ? ಹಾಗಿದ್ದರೆ, ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 9686399493 ನಂಬರ್ ಸೇರಿಸಿ.

ಗ್ರೂಪ್ ಗೆ ಜಾಯಿನ್ ಆಗಿ:
https://chat.whatsapp.com/BHOOdLNNvmD17cBJslQgwj