ಗಾಝಾ ಕದನ ವಿರಾಮವನ್ನು ಭದ್ರಪಡಿಸಿಕೊಳ್ಳಲು ತಕ್ಷಣದ ಕ್ರಮಗಳನ್ನು ತೆಗೆದುಕೊಳ್ಳದಿದ್ದರೆ ಅಮೆರಿಕ‌ ಅಧ್ಯಕ್ಷ ಜೋ ಬೈಡನ್ ಅವರ 2024 ರ ಚುನಾವಣೆಗೆ ದೇಣಿಗೆ ಮತ್ತು ಮತಗಳನ್ನು ತಡೆಹಿಡಿಯಲು ಲಕ್ಷಾಂತರ ಮುಸ್ಲಿಂ ಮತದಾರರನ್ನು ಸಜ್ಜುಗೊಳಿಸಲು ಕೆಲಸ ಮಾಡುವುದಾಗಿ ಮುಸ್ಲಿಂ ಅಮೆರಿಕನ್ನರು ಮತ್ತು ಕೆಲವು ಡೆಮಾಕ್ರಟಿಕ್ ಪಕ್ಷದ ಕಾರ್ಯಕರ್ತರು ಎಚ್ಚರಿಕೆ ನೀಡಿದ್ದಾರೆ.

ಮಿಚಿಗನ್, ಓಹಿಯೋ ಮತ್ತು ಪೆನ್ಸಿಲ್ವೇನಿಯಾದಂತಹ ಚುನಾವಣೆಯನ್ನು ನಿರ್ಧರಿಸುವ ಸಾಧ್ಯತೆ ಇರುವ ರಾಜ್ಯಗಳ ಡೆಮಾಕ್ರಟಿಕ್ ಪಕ್ಷದ ನಾಯಕರನ್ನು ಒಳಗೊಂಡಿರುವ ನ್ಯಾಷನಲ್ ಮುಸ್ಲಿಂ ಡೆಮಾಕ್ರಟಿಕ್ ಕೌನ್ಸಿಲ್, ಮಂಗಳವಾರ ಕದನ ವಿರಾಮಕ್ಕೆ ಮಧ್ಯಸ್ಥಿಕೆ ವಹಿಸಲು ಇಸ್ರೇಲ್ ನೊಂದಿಗಿನ ತನ್ನ ಪ್ರಭಾವವನ್ನು ಬಳಸುವಂತೆ ಬೈಡನನ್‌ಗೆ ಕರೆ ನೀಡಿದೆ.

“2023 ಕದನ ವಿರಾಮ ಅಂತಿಮ ಎಚ್ಚರಿಕೆ” ಎಂಬ ಶೀರ್ಷಿಕೆಯ ಬಹಿರಂಗ ಪತ್ರದಲ್ಲಿ, ಮುಸ್ಲಿಂ ನಾಯಕರು ಮುಸ್ಲಿಂ ಮತದಾರರನ್ನು “ಫೆಲೆಸ್ತೀನ್ ಜನರ ವಿರುದ್ಧ ಇಸ್ರೇಲಿ ಆಕ್ರಮಣವನ್ನು ಅನುಮೋದಿಸುವ ಯಾವುದೇ ಅಭ್ಯರ್ಥಿಗೆ ಅನುಮೋದನೆ, ಬೆಂಬಲ ಅಥವಾ ಮತಗಳನ್ನು ತಡೆಹಿಡಿಯಲು ಸಜ್ಜುಗೊಳಿಸುವುದಾಗಿ” ಪ್ರತಿಜ್ಞೆ ಮಾಡಿದ್ದಾರೆ.

ಧನಸಹಾಯ ಮತ್ತು ಶಸ್ತ್ರಾಸ್ತ್ರಗಳನ್ನು ಒಳಗೊಂಡ ನಿಮ್ಮ ಆಡಳಿತದ ಬೇಷರತ್ತಾದ ಬೆಂಬಲವು ನಾಗರಿಕರ ಸಾವುನೋವುಗಳಿಗೆ ಕಾರಣವಾಗುತ್ತಿರುವ ಹಿಂಸಾಚಾರವನ್ನು ಶಾಶ್ವತಗೊಳಿಸುವಲ್ಲಿ ಮಹತ್ವದ ಪಾತ್ರ ವಹಿಸಿದೆ. ಈ ಹಿಂದೆ ನಿಮ್ಮ ಮೇಲೆ ನಂಬಿಕೆ ಇಟ್ಟಿದ್ದ ಮತದಾರರ ಮೇಲಿನ ನಂಬಿಕೆಯನ್ನು ನಾಶಪಡಿಸಿದೆ ಎಂದು ಕೌನ್ಸಿಲ್ ಆಕ್ರೋಶ ವ್ಯಕ್ತಪಡಿಸಿದೆ.

ಗಾಝಾದಿಂದ ಅಕ್ಟೋಬರ್ 7 ರಂದು ಹಮಾಸ್ ಬಂಡುಕೋರರು ನಡೆಸಿದ ದಾಳಿಯ ನಂತರ ಗಾಝಾ ಪಟ್ಟಿಯ ಮೇಲೆ ಇಸ್ರೇಲ್ ನಡೆಸಿದ ದಾಳಿಯನ್ನು ಖಂಡಿಸಲು ಬೈಡನ್ ವಿಫಲವಾದ ಬಗ್ಗೆ ಅರಬ್ ಮತ್ತು ಮುಸ್ಲಿಂ ಅಮೆರಿಕನ್ ಸಮುದಾಯಗಳಲ್ಲಿ ಹೆಚ್ಚುತ್ತಿರುವ ಕೋಪ ಮತ್ತು ಹತಾಶೆಯ ಇತ್ತೀಚಿನ ಸಂಕೇತವಾಗಿದೆ.