ಯಾವುದೇ ಚಟವನ್ನಾದರೂ ಸುಲಭವಾಗಿ ಬಿಟ್ಟು ಬಿಡಬಹುದು ಆದ್ರೆ… ಸಿಗರೇಟ್ ಕೈಯಲ್ಲಿ ಒಂದು ಬಾರಿ ಹಿಡಿದು ಸೇದಿದ ಎಂದರೆ ಅದನ್ನು ಬಿಡುವುದು ಅಷ್ಟು ಸುಲಭದ ಕೆಲಸವಲ್ಲ ಎಂದೇ ಸಾಮಾನ್ಯವಾಗಿ ಈ ಚಟಕ್ಕೆ ಬಿದ್ದವರು ಹೇಳುತ್ತಾರೆ.  ಇದನ್ನೇ ಇದೀಗ ಅಧ್ಯಯನವೊಂದು ಕೂಡ ಹೇಳಿದೆ.

ದಿನಕ್ಕೆ ಒಂದೇ ಒಂದು ಸಿಗರೇಟ್ ಸೇದುವವರು ಬಹಳ ಬೇಗನೆ ನಿಕೋಟಿನ್ ಚಟಕ್ಕೆ ಅಂಟಿಕೊಳ್ಳುತ್ತಾರಂತೆ.  ಅಮೆರಿಕದ ಅಧ್ಯಯನವೊಂದು ಈ ಸತ್ಯವನ್ನು ಹೇಳಿದೆ. ಇವರು ಸುಮಾರು 6,700 ಧೂಮಪಾನಿಗಳನ್ನು ಸಂದರ್ಶಿಸಿ ಈ ಬಗ್ಗೆ ಕೇಳಿದ್ದಾರೆ. ಇವರ ಪೈಕಿ ಎಲ್ಲರು ಕೂಡ ದಿನವೊಂದಕ್ಕೆ 1ರಿಂದ 4 ಸಿಗರೇಟ್ ವರೆಗೆ ಸೇದುತ್ತಿದ್ದವರಾಗಿದ್ದಾರೆ. ಆದರೆ ಇದೀಗ ಸಿಗರೇಟ್ ಗೆ ಸಂಪೂರ್ಣವಾಗಿ ದಾಸರಾಗಿ ಬಿಟ್ಟಿದ್ದಾರೆ.

ಸಾಮಾನ್ಯವಾಗಿ ಒಬ್ಬ ವ್ಯಕ್ತಿ 10 ದಿನ ಸಿಗರೇಟ್ ಸೇದಿನೆಂದರೆ, ಮತ್ತೆ ಅದರಿಂದ ಆತ ವಾಪಸ್ ಬರುವುದು ಬಹಳ ಕಷ್ಟಕರವಾಗಿದೆ.  ಕಡಿಮೆ ಸಿಗರೇಟ್ ಸೇದಿದರೆ ಸಮಸ್ಯೆ ಇಲ್ಲ ಎಂದು ಕೆಲವರು ಹೇಳುತ್ತಾರೆ. ಆದರೆ, ಈ ಕಡಿಮೆ ಸಿಗರೇಟ್ ಸೇದುವುದು ಮುಂದೆ ಹೆಚ್ಚು ಸಿಗರೇಟ್ ಸೇದುವ ಮಟ್ಟಕ್ಕೆ ಬೆಳೆಯಲು ಆರಂಭ ಅಷ್ಟೆ ಎಂದು ಸಂಶೋಧಕರು ಹೇಳುತ್ತಾರೆ.

ಕಡಿಮೆ ಸಿಗರೇಟು ಸೇದುವವರು ಸಿಗರೇಟ್ ನ ಚಟಕ್ಕೆ ಬಲಿಯಾಗುವುದಿಲ್ಲ ಎನ್ನುವುದು ಸುಳ್ಳು. ದಿನ ಬಿಟ್ಟು ದಿನ ಸಿಗರೇಟ್ ಸೇದಿದರೂ ಸಿಗರೇಟ್ ಗೆ ದಾಸರಾಗಿ ಬಿಡುವುದರಲ್ಲಿ ಯಾವುದೇ ಅನುಮಾನವಿಲ್ಲ ಎಂದು ಅಧ್ಯಯನದಲ್ಲಿ ಹೇಳಲಾಗಿದೆ.