ಸಂವಿಧಾನ ಜಾರಿಗೆ ಬಂದ ದಿನ ಗಣರಾಜ್ಯೋತ್ಸವ

26/01/2022

ರಘೋತ್ತಮ ಹೊ.ಬ.

ಇಂದು ಸಂವಿಧಾನ ಜಾರಿಗೆ ಬಂದ ದಿನ. ಈ ಸಂವಿಧಾನ ಜಾರಿಗೆ ಬರುವ ಮೊದಲು ನಾವು ಅನೇಕ ಪ್ರಾಚೀನ ವಿವಿಧ ಧಾರ್ಮಿಕ ಸ್ಮೃತಿಗಳು, ಮಹಮ್ಮದೀಯರು ಮತ್ತು ಬ್ರಿಟಿಷರು ತಮಗಾಗಿ ರೂಪಿಸಿಕೊಂಡಿದ್ದ ಕೆಲವು ಕಾನೂನುಗಳಿಂದ ನಾವು ಆಳಲ್ಪಡುತ್ತಿದ್ದೆವು. ಆ ಕಾರಣಕ್ಕೆ ಅನೇಕರಿಗೆ ಶಿಕ್ಷಣ ಸಿಕ್ಕಿರಲಿಲ್ಲ. ಯಾಕೆಂದರೆ ಸ್ಮೃತಿಗಳಲ್ಲಿ ಶಿಕ್ಷಣ ಕೊಡಬೇಕು ಎಂಬ ಕಾನೂನು ಇರಲಿಲ್ಲ. ಮಹಿಳೆಯರಿಗೆ ಯಾವುದೇ ಬಗೆಯ ಸ್ವಾತಂತ್ರ್ಯ ಇರಲಿಲ್ಲ. ಯಾಕೆಂದರೆ ಸ್ಮೃತಿ ಮತ್ತು ಮಹಮ್ಮದೀಯ ಕಾನೂನುಗಳು ಅದಕ್ಕೆ ಅವಕಾಶ ಕೊಟ್ಟಿರಲಿಲ್ಲ. ಆದರೆ ಭಾರತದ ಸಂವಿಧಾನ ಎಲ್ಲಾ ಲೋಪಗಳನ್ನು ಇಡೀ ದೇಶಕ್ಕೆ ಒಂದು ಸಾಮಾನ್ಯ ಕಾನೂನು ನೀಡಿತು. ಆ ಕಾನೂನು ಜಾರಿಗೆ ಬಂದ ದಿನವಿದು. ಅಂತಹ ಜಾರಿಗೆ ತರುವ ಪ್ರಕ್ರಿಯೆ ಒಂದೇ ದಿನದಲ್ಲಿ ಆಗುವಂತಹದ್ದಲ್ಲ ಅದೊಂದು ನಿರಂತರ ಪ್ರಕ್ರಿಯೆ. ಬಹುಶಃ ಈ ಭೂಮಿ ಇರುವವರೆಗೂ. ಯಾಕೆಂದರೆ men may come men may go but ಆ ಕಾನೂನು ಅದು ಸದಾ ಜಾರಿಯಲ್ಲಿರುತ್ತದೆ.

ಸಣ್ಣಪುಟ್ಟ ಬದಲಾವಣೆಗಳಾಗಬಹುದು. ಅದಕ್ಕೆ ತಿದ್ದುಪಡಿಗಳ ಮೂಲಕ ಸಂವಿಧಾನವೇ ಅವಕಾಶ ಮಾಡಿಕೊಟ್ಟಿದೆ. ಆದರೆ overall ಇಡೀ ಸಂವಿಧಾನ ಬದಲಿಸಲು ಸಾಧ್ಯವೇ ಇಲ್ಲ. ಯಾಕೆಂದರೆ ದೇಶ ಅಸ್ತಿತ್ವ ಹೊಂದಿರುವುದೇ ಸಂವಿಧಾನದ ಅನುಚ್ಛೇದ 1 ರ ಆಧಾರದ ಮೇಲೆ. ಹೀಗಿರುವಾಗ ಅದನ್ನು ಬದಲಿಸುವ ಮಾತು ದೇಶಕ್ಕೆ ಸಂಬಂಧಪಡದವರ ಅಂದರೆ ಹೊರಗಿನವರು ಮಾತಾಡುವ ಕ್ರಿಯೆಯ ಮಾದರಿಯಾಗುತ್ತದೆ, ದೇಶದ್ರೋಹವಾಗುತ್ತದೆ.

ಸಣ್ಣಪುಟ್ಟ ತೊಂದರೆಗಳಿದ್ದರೆ ಅದೇ ಸಂವಿಧಾನದ ಅನುಚ್ಛೇದ 32 ನೀಡಿರುವ ಸಂವಿಧಾನಾತ್ಮಕ ಪರಿಹಾರಗಳ ಹಕ್ಕುಗಳನ್ನು ಬಳಸಿ ಪರಿಹಾರ ಪಡೆಯಬಹುದು. [ಸಂವಿಧಾನ ಶಿಲ್ಪಿ ಡಾ.ಅಂಬೇಡ್ಕರರು ಈ ಅನುಚ್ಛೇದ 32 ನ್ನು ಸಂವಿಧಾನದ ಆತ್ಮ ಎನ್ನುತ್ತಾರೆ] ಅದು ಬಿಟ್ಟು ಸಂವಿಧಾನದ ವಿರುದ್ಧ ಮಾತನಾಡುವುದು ಎಂದಿಗೂ ಸಲ್ಲ. ಎಲ್ಲರಿಗೂ ಸಂವಿಧಾನ ಜಾರಿಗೊಂಡ ಈ ದಿನದ ಅಂದರೆ ಗಣತಂತ್ರದ ದಿನದ ಶುಭಾಶಯಗಳು ಸಂವಿಧಾನವನ್ನು ಗೌರವಿಸೋಣ, ಅದನ್ನು ಅಧ್ಯಯನ ಮಾಡೋಣ, ದೇಶಪ್ರೇಮಿಗಳಾಗೋಣ.