ಕಾಫಿ ಶಾಪ್ ನಲ್ಲಿ ಮೂಡಿದ ಪ್ರೀತಿ: ಉತ್ತರಪ್ರದೇಶದ ಯುವಕನ ಜತೆ ಕೊರಿಯಾ ಯುವತಿ ಮದುವೆ
ಇತ್ತೀಚೆಗೆ ಗಡಿ ದಾಟಿದ ಪ್ರೇಮ ಪ್ರಕರಣಗಳು ಹೆಚ್ಚಾಗಿ ಸುದ್ದಿಯಾಗುತ್ತಿದೆ. ದಕ್ಷಿಣ ಕೊರಿಯಾದ ಯುವತಿಯೊಬ್ಬಳು ತಾನು ಪ್ರೀತಿಸಿದ ಯುವಕನನ್ನು ಮದುವೆಯಾಗುವುದಕ್ಕೆ ಭಾರತಕ್ಕೆ ಬಂದಿದ್ದಾಳೆ.
ದಕ್ಷಿಣ ಕೊರಿಯಾದ ಕಿಮ್ ಬೊಹ್ ನಿ ಎಂಬಾಕೆ ತನ್ನ ಪ್ರಿಯಕರ ಭಾರತದ ಸುಖ್ಜೀತ್ ಸಿಂಗ್ ಎಂಬಾತನನ್ನು 2 ವರ್ಷದ ಹಿಂದೆ ಸೌತ್ ಕೊರಿಯಾದ ಕಾಫಿ ಶಾಪ್ನಲ್ಲಿ ಭೇಟಿಯಾಗಿದ್ದಾರೆ. ಬಳಿಕ ಒಬ್ಬರಿಗೊಬ್ಬರು ಪರಿಚಯ ಆಗಿದ್ದಾರೆ. ಪರಿಚಯ ಪ್ರೀತಿಯಾಗಿ ಬದಲಾಗಿದ್ದು ಈಗ ಇಬ್ಬರು ದಂಪತಿಯಾಗಿ ಹೊಸ ಜೀವನಕ್ಕೆ ಕಾಲಿಟ್ಟಿದ್ದಾರೆ.
ಆರು ತಿಂಗಳ ಮಟ್ಟಿಗೆ ಸುಖ್ಜೀತ್ ಭಾರತಕ್ಕೆ ಮರಳಿದ್ದ. ಆದರೆ ಈ ಅವಧಿಯಲ್ಲಿ ಆತನನ್ನು ಬಿಟ್ಟಿರಲಾಗದೇ ಚಡಪಡಿಸಿದ್ದ ಕೊರಿಯನ್ ಯುವತಿ ತನ್ನ ದೇಶ ಬಿಟ್ಟು ಭಾರತಕ್ಕೆ ಬಂದಿದ್ದಾಳೆ. ಎರಡು ದಿನಗಳ ಹಿಂದೆ ಉತ್ತರ ಪ್ರದೇಶದ ಶಹಜಹಾನ್ ಪುರ ಜಿಲ್ಲೆಯ ಪುವಾಯಾನ್ ನಲ್ಲಿರುವ ಗುರುದ್ವಾರ ನಾನಕ್ ಬಾಗ್ ನಲ್ಲಿ ಈ ಜೋಡಿ ಸಿಖ್ ಸಂಪ್ರದಾಯದಂತೆ ಮದುವೆಯಾಗಿದ್ದಾರೆ.
3 ತಿಂಗಳ ಟೂರಿಸ್ಟ್ ವೀಸಾದಲ್ಲಿ ಕಿಮ್ಸ್ ಭಾರತಕ್ಕೆ ಬಂದಿದ್ದು, ಇನ್ನು ಒಂದು ತಿಂಗಳ ಮಟ್ಟಿಗೆ ಇಲ್ಲಿರಲಿದ್ದಾಳೆ. ಆ ಬಳಿಕ ಆಕೆ ದಕ್ಷಿಣ ಕೊರಿಯಾಗೆ ವಾಪಸ್ ತೆರಳಲಿದ್ದಾಳೆ. ಅದಾಗಿ ಮೂರು ತಿಂಗಳ ಬಳಿಕ ಸುಖ್ಜೀತ್ ಕೂಡ ಸೌತ್ ಕೊರಿಯಾಗೆ ಹೋಗಲಿದ್ದಾನೆ. ಮುಂದೆ ಆಕೆಯೊಂದಿಗೆ ದಕ್ಷಿಣ ಕೊರಿಯಾದಲ್ಲಿ ನೆಲೆಸುವುದಾಗಿ ಆತ ಹೇಳಿಕೊಂಡಿದ್ದಾನೆ.
